Անդրեաս Շլայխերը Տնտեսական համագործակցության և զարգացման կազմակերպության (ՏՀԶԿ/OECD) Կրթության և հմտությունների վարչության տնօրենն է: Նա նախաձեռնել և վերահսկում է «Աշակերտների միջազգային գնահատման ծրագիրը» (PISA) և միջազգային այլ գործիքներ, որոնք ստեղծել են համաշխարհային հարթակ տարբեր երկրների ու մշակույթների քաղաքականություն մշակողների, հետազոտողների և մանկավարժների համար՝ նորարարություններ ներդնելու և կրթական քաղաքականությունն ու գործելակերպը վերափոխելու նպատակով:

Ավելի քան 20 տարի նա աշխատել է աշխարհի տարբեր երկրների նախարարների և կրթության ոլորտի առաջնորդների հետ՝ բարելավելու կրթության որակն ու հավասարությունը: ԱՄՆ կրթության նախկին նախարար Արնե Դանկանն ասել է, որ Շլայխերը «համաշխարհային խնդիրներն ու մարտահրավերները հասկանում է նույնքան լավ կամ ավելի լավ, քան որևէ մեկը, ում ես հանդիպել եմ, և նա ինձ ճշմարտությունն է ասում» (The Atlantic, հուլիսի 11): Մեծ Բրիտանիայի նախկին պետքարտուղար Մայքլ Գոուվը Շլայխերին անվանել է «անգլիական կրթության ամենակարևոր մարդը», թեև նա գերմանացի է և ապրում է Ֆրանսիայում:

Նախքան ՏՀԶԿ-ին միանալը, նա եղել է Կրթական նվաճումների գնահատման միջազգային ասոցիացիայի (IEA) վերլուծության գծով տնօրենը: Նա ֆիզիկա է սովորել Գերմանիայում, իսկ մաթեմատիկայի և վիճակագրության աստիճան ստացել է Ավստրալիայում: Նա արժանացել է բազմաթիվ պատվավոր կոչումների և մրցանակների, այդ թվում՝ «Թեոդոր Հոյսի» մրցանակին, որը շնորհվում է Գերմանիայի Դաշնային Հանրապետության առաջին նախագահի անունից՝ «Օրինակելի ժողովրդավարական ներգրավվածության» համար: Նա Հայդելբերգի համալսարանի պատվավոր պրոֆեսոր է: